Navodnjenje v sělu

kategorija: ZASMĚŠKY
datum: 2018-01-01, avtor: aVM

V sělu někde v Evropě je veliko navodnjenje, voda raste jedin metr, ljudi organizujut evakuaciju.

V jednom domu žije stary pobožny duhovnik, možno rabin ili pravoslavny ili drugy. Prijehaje k jegovu domu evakuačny transporter i šofer kaže: "Otče, prihodi k nam!" Ale duhovnik otvěti: "Ne jest trěba, Bog vse vidi, on mně bude pomagati, dělajte něčto druge." I ničto.

Voda dalje raste, i uže jest dva metry. Poslědni ljudi sut evakuovani na motorovyh gumovyh lodicah, na gumakah. Duhovnik jest u otvorjenogo okna svojego doma, k njemu pripluje jedin gumak, i iz njego ljudi govoret: "Otče, prihodi k nam!" Ale duhovnik otvěti: "Ne jest trěba, Bog vse vidi, on mně bude pomagati, dělajte něčto druge." I ničto.

Potom je voda četyri metry, vse jest pod vodoju. Duhovnik sědi u dymaku na kryši svojego doma, i k njemu prilěti helikoptera. Pilot iz helikoptery spusti konopas i kriči: "Otče, prihodi k nam!" Ale duhovnik otvěti: "Ne jest trěba, Bog vse vidi, on mně bude pomagati, dělajte něčto druge." I ničto.

Voda ješte mnogo raste, duhovnikov dom padaje do vody, duhovnik udavi se vodoju, i umre. Jegova duša stoji v nebesi prěd Bogom i pytaje se: "Bože moj, začto jesi mi ne pomagal? Začto jesm mrtvy?" Ale Bog jemu otvěti: "Ty lžeš nezahvalniče, že ne jesm tobě pomagal! Čto mysliš, že byl toj transporter? Čto mysliš, že byl toj gumak? Čto mysliš, že byla ta helikoptera?"