Bitva u Wogastisburgu

kategorija: KULTURA - OBČINA - HISTORIJA
datum: 2022-10-09, avtor: aVM

Wogastisburg byla drěvěna tvrdža (krěpost), kde byla slavna bitva medžu vojskami frančskogo kralja Dagoberta i slovjanskogo vladyky Sama. Fredegarov lětopis piše, že bitva byla v lětah 631 ili 632, kogda slovjansko vojsko na glavu porazilo armadu atakujučih frankov. Mnogo frančskyh vojnikov v tutoj bitvě umrelo, i živeči iz bitvy uběgli ostaveči na městu vse svoje vojenne věči. Potom poslě peti (5) lět, Samovi slovjani atakovali susědno frančsko ozemje, aby podkrěpili svoju državu. Poraženje frančskyh vojsk imělo veliky oglas medžu slovjanami. Napriměr lužičsko-srbsky vojevoda Dervan odšel od frančskogo kralja Dagoberta i prišel pod Samovu vladu.


Samovo kraljevstvo i odgadyvano město bitvy (iz mapy na sajtu michalmuszynski.com)

Vladyka Samo byl glavoju prvogo znajemogo slovjanskogo kraljevsta na světu, ktoro v sedmom (7-om) stolětju ležalo na teritoriji dnešnoj Čehije i čestečno ješče susědnyh ozemjah. Fredegarov lětopis govori, že Samo prvonačelno byl trgovec, ktory došel k slovjanam iz neznajemogo kraja Sennonago, ale lětopis o hristijanizaciji Bavorov i Korutancev govori, že Samo byl slovjansky vladyka iz Korutanije (dnes Avstrija i Slovenija). Imena ljudij često byly kračene v lětopisah (napriměr velikomoravsky Rastislav byl pisany Rastic), potom Samo možno byl od Samoslava ili někakogo drugogo dolžejšego imene.


Samo (freska iz hrama-rotundy v gradu Znojmo v Čehiji)

Dnes točno znajemo, kde ležala tvrdža v lětopisu imenovana Wogastisburg. Imajemo několiko kandidatov na teritoriji dnešnoj Čehije, ale alternativne teorije takože govoret o městah v dnešnyh Avstriji i Slovakiji. Jedin taky važny kandidat jest vrh nazvany Rubín ležeči u češskogo grada Podbořany, kde arheologi našli trvdžu iz sedmogo slolětja i vojenne věči slovjansko-avarskogo pohodženja.


Vrh Rubín (Vikipedija)

Drugy možno ješče važnějši kandidat jest stolova gora u češskogo grada Kadaň, dnes v češskom jezyku nazvana Úhošť, čto bylo v staryh vrěmenah Vugošč. Tuta gora i blizko selo byli naseljene uže od vrěmen prehistoričnyh kultur takože s mnogymi arheologičnymi odkrytjami. Jest možno, že latinsko pišeči avtor lětopisa trěboval napisati do knigy něčto kako Vugaščev grad, čto frančski pamětniki tutoj bitvy mogli jemu povědati kako Wogastis-burg.


Stolova gora Úhošť (Vikipedija)



QR-kod članka