Reportaž iz medžunarodnogo festivala domorodnyh tradicij Rodokrug, 9-ogo septembra 2023

kategorija: KULTURA - OBČINA - HISTORIJA
datum: 2023-09-13, avtor: redakcija

Subotoju 9-ogo septembra lěta 2023 (dva tyseč dvadeset tri) odbyval se medžunarodny festival domorodnyh tradicij Rodokruh 2023 (češsko slovo Rodokruh znači krug rodov, Rodokrug). Festival organizovalo češsko družstvo s festivalom ravnym imenem Rodokruh, ktoro uže podobny festival organizovalo prošle lěta (tu možete čitati naš članok i viděti fotografije i video iz lěta 2022: https://interslavic.news/index?clanok=88). Festival odbyval se v prostorah ranča Andy West Ranch, ktory jest pod bazaltovym vrhom Kunětická hora (gora) ležučim v nizině rěky Labe približno jedno sto kilometrov vozhodno od češskogo stoličnogo grada Praga. Kuněticka gora jest mitično staroslovjansko i takože keltsko město, kde v davnom věku byli različne svetilišča naših prědkov i nyně tamo stoji dobropoglědny srědnověčny zamok.

Jest nam mnogo milo izraziti velike hvalu i blagodarjenje organizatoram festivala pod rukovodstvom gospože Mari Krejčířovoj, gospodina Petra Svatobora Vosátky, vsim drugym činovnikam i učestvujučim členam vsečešskogo družstva Rodokruh (Rodokrug) i ješče v neposlědnom redu takože žrecu Zdeněku Ordeltu za odličnu možnost prubovati novy kulturny potencijal medžuslovjanskogo jezyka, ktory jest dostatočno dobro razumivy vsim slovjanskogovorečim ljudam bez potrěbnosti učenja, do rekonstruovanyh staroslovjanskyh domorodny ritualov. Na osnově tutogo eksperimenta budemo gotoviti oficijalny češsko-medžuslovjansky tekst netoliko tutogo obreda ale takože ješče drugyh tekstov uživanyh družstvom Rodokruh. V kratkom času do tutoj temy ješče budemo vratiti se pri našem četvrtom medžuslovjanskom podkastu. Nehaj medžuslovjanska sila bude s Vami!


Otvorjenje festivala (1)

Otvorjenje festivala (2)

Otvorjenje festivala (3)

Početok obreda (žrec Zdeněk Ordelt govori češskym jezykom i Vojta Merunka prěkladaje jegova slova do medžuslovjanskogo jezyka)



QR-kod članka