Reportaž o medžuslovjanskom dnju v Pragě 21-ogo septembra 2022

kategorija: RAZLIČNO
datum: 2022-09-28, avtor: redakcija

Srědoju 21-ogo septembra 2022 odbyvalo se v Pragě raboče strěčenje koristnikov i novyh ljudij interesujučih se do medžuslovjanskogo jezyka. Tutoj Medžuslovjansky denj byl so-organizovany od Unije češskyh prěložiteljev i prěkladateljev (https://www.jtpunion.org/en/) i Vojtěcha Merunky iz medžuslovjanskoj občiny.

Program dnja sostojal se iz jutrenjih trěh časin prezentacije i učenja se gramatikě, pravopisanju v latinici i kirilici, slovniku i morfologiji, aby učestniki dovědali se kako učiti se i praktikovati medžuslovjansky jezyk.

prezentacija gramatiky medžuslovjanskogo jezyka

Potom poslě pauzy na oběd novi govorniki jezyka iměli možnost tri časiny besědovanja s onlajn gostami, medžu ktorymi byli medžuslovjanske super-zvězdy (abecedno) Alla Sokolova, Filip Kovčin, Jan van Steenbergen, Jaroslav Serhiejev, Mito Matija, i Roberto Lombino. Svoje video-pozdravy prigotovili znajemi medžuslovjanski jutuberi i tvorci medžuslovjanskoj muziky Michał Swat i Ljoša Melac. Redaktor i jutuber Tima Zagorski byl fizično na městu v Pragě. Vsej denj od 9-oj (devetoj) do 17-oj (sedmnadsetoj) časiny govorilo se toliko medžuslovjansky.

Učestniki dostali prěgled grammatiky medžuslovjanskogo jezyka, zapisnik od Unije češskyh prěkladateljev i prěložiteljev, i rabotali s učebnikom medžuslovjanskogo jezyka. Na městu bylo osvěženje kavoju, čajom i malym jadenjem.

Počas dnja rabotalo se s različnymi tekstami i takože byl dělany maly test razumjenja medžuslovjanskomu jezyku. Novi govorniki mogli besědovati s znajemymi ljudami medžuslovjanskoj komunity, ktore znajut iz socijalnyh sětij i jutubovyh i drugyh kanalov.

Na městu bylo 11 (jedinnadset) učestnikov iz Bělorusi, Čehije, Russije, Ukrajiny i Srbije. Něktori došli do Pragy dalekym putovanjem vlakami i avtobusami, napriměr gospodini Milorad Vasiljević iz Novi Sada i Sergej Galasuj iz Berlina. Na on-lajn besědah bylo ješče priključeno druhyh 14 (četyrinadset) učestnikov iz Čehije, Hrvatije, Niderlandov, Poljsky, Rosije, Srbije, Ukrajiny, i Slovakije. Na različne temy o možnostah budučej soraboty besědovalo se s gospodinom Kimom Artamonovom iz Nižnogo Novgoroda, ktory jest činiteljem Mladežnogo parlamenta Nižegorodskoj oblasti.

Profesija ljudij interesujučih se do medžuslovjanskogo jezyka byla mnogo različna - od studentov črěz muzikanty, komputerove programatory, lingvisty, rabotniki v kulturě, členi različnyh kulturnyh organizacij, i takože duhovnik češskoslovačskoj husitskoj crkvy.

Mnogo děkujemo gospodinu Petru Kautskomu, sekretaru Unije češskyh prěkladateljev i prěložiteljev, za organizačny i materijalny podpor medžuslovjanskogo dějstvovanja v prostorah Unije. Medžuslovjansky denj oficijalo byl organizovany kako sorabota Unije češskyh prěkladateljev i prěložiteljev s Medžuslovjanskoju komunitoju.

Velika blagodarnost takože prinaležaje Jaroslavu Serhiejevu, ktory s Michałom Swatom i Ljošom Melacom prigotovil i administroval jutubovy lajvstrim, kde podčas dnja priključeno bylo 567 (petstošestdesetsedm) ljudij.

MP4 fajl na daunlodovanje: Prezentacija gramatiky medžuslovjanskogo jezyka (.../2022-09-ms-denj/prezentacija-gramatiky.mp4 - 1.14 GB, 2 časiny 31 minut)
PDF fajl na daunlodovanje: Prezentacija gramatiky medžuslovjanskogo jezyka (.../2022-09-ms-denj/prezentacija-gramatiky.pdf)
PDF fajl na daunlodovanje: Medžuslovjanske tablice na dvě stranice (...oc/2022-09-ms-denj/ms-tablice-2stranice.pdf)
PDF fajl na daunlodovanje: Test razuměnja medžuslovjanskomu jezyku - tekst o pivu (...news/doc/2022-09-ms-denj/test-MS-jezyka.pdf)
Učebnik medžuslovjanskogo jezyka: Interslavic zonal constructed language: an introduction for English speakers (...l_constructed_language.html?id=egpTDwAAQBAJ)