Medžuslovjanska muzika

kategorija: KULTURA - OBČINA - HISTORIJA
datum: 2022-07-24, avtor: redakcija

Medžuslovjansky jest pomočny jezyk, ktory slovjani različnyh narodov koristajut do komunikacije jedin s drugym na osnově dobroj razumivosti bez potrěby prědhodnogo učenja. Potencijal našego projekta jest prvoplanovo podavati možnost ljudjam, ktori aktivno rabotajut v turistikě, kulturě, biznesu, ili občinskom voditeljstvu, aby iměli široko publikum od slovjanskojezyčnyh sluhateljev iz različnyh narodov, ktori mogut koristiti razumivost pisanomu ili slyšenomu medžuslovjanskomu jezyku bez učenja, čto može byti priblizno tri sto milijonov (300.000.000) ljudij.

Na rovnoj osnově može rabotati i popularna muzika, kde takože jest dostatočno, aby sluhatelji razuměli slovam v pěsnjah, ale ne trěba jim, aby oni sami aktivno govorili. Do medžuslovjanskogo jezyka ne imělo by mnogo smysla prěkladati vsim dobro znajeme narodne pěsnje, zatože medžuslovjansky projekt ne hoče nikako brati město živym narodnym slovjanskym jezykam i kulturam, ale imajemo s pomočju interneta široko otvorjenu udobnomožnost dělati svoje novo originalno tvorčestvo, aby avtori, pěvatelji, i sluhatelji iz različnyh narodov lušče znali jedin drugogo.

Dnes bylo publikovano uže peto (5.) medžuslovjansko album s imenem Ogonj i voda od avtora Ljoša Melac iz Poljsky. Album sodržaje dvanadset (12) pěsnj i dolgo jest petdeset šest (56) minut.

Medžuslovjansky medijalny prostor imaje ješče mnoge druge interesne projekty medžuslovjanskyh pěsnj s medžuslovjanskymi zvukom i tekstami i profesijonalnoj dramaturgijej, kako odlične tamburašska pěsnja Masovo pogrebanje od hrvatskogo avtora Mito Matija i disko-pěsnja Karpaty od ukrajinskoj grupy TheVyo.

Redakcija děkuje vsim avtoram, pěvateljam, muzikantam i tehničskym pomočnikam za ogromnu rabotu do projekta medžuslovjanskogo jezyka.

Ogonj i voda (album, avtor Ljoša Melac, video je s podtekstami)

Masovo pogrebanje (pěsnja, avtor Mito Matija, video je s podtekstami)

Karpaty (pěsnja, avtor TheVyo, video je s podtekstami)



QR-kod članka