Prezentacija medžuslovjanskogo jezyka v ČUŽN Praga dlja studentov iz indijskyh univerzitetov

kategorija: NAUKA - TEHNIKA
datum: 2023-03-06, avtor: redakcija

Tute dnji meseca marta 2023 provodi se na Češskom univerzitetu životnyh nauk Praga (https://www.czu.cz/en) posěčenje studentov i akademičnyh rabotnikov iz indijskyh univerzitetov pod patronacijeju Jegovoj Ekscelencije Poslanika Republiky Indija v Čehiji pana Dr. S. Jaishankara (Džajšankara), ktori poslědujut različne lekcije iz mnogyh oblastij nauky i akademičnyh aktivnostij. Posěčenje bude se končiti 21-ogo marta obrednym darovanjem certifikatov. Od tutogo povoda Vojtěch Merunka v srědu 7-ogo marta prezentoval projekt našego medžuslovjanskogo jezyka.


indijski studenti

Gosti iz Indije byli udivjeni medžuslovjanskym projektom, ktory javi se podobnym do lingvističnoj situacije sěvernoj Indije, kde indijske jezyky tvoret grupu sobě blizkyh jezykov kako naše slovjanske jezyky. Takože jesmo besědovali o umětnoj inteligenciji (Chat GPT i Google Translator), ktore razumějut medžuslovjansky rovno kako žive ljudi bez potrěbnosti prědhodnogo učenja, formalnom modelu medžuslovjanskogo jezyka, takože o podobnosti jegovogo slovnika i jegovoj gramatiky do staroindijskogo Sanskrta, i o možnostah zonalnyh konstruovanyh jezykov v modernom vrěmeni do pomoči biznesu, turizma i zaščity kulturnogo naslědstva.


pan Sukumar Gouri Boyina

Akademičny program sostavil i organizoval uvažimy pan Sukumar Gouri Boyina, ktoromu mnogo děkujemo za jegovu otličnu rabotu i poddrženje.



QR-kod članka