Reportaž iz medžuslovjanskogo dnja 5-ogo septembra 2023 v Pragě

kategorija: RAZLIČNO
datum: 2023-09-05, avtor: aVM

Vtory medžuslovjansky denj (rabotno strěčenje i škola medžuslovjanskogo jezyka) odbyval se v Pragě cěly denj 5-ogo septembra 2023 blagodareč velikoj pomoči od družstva Češska unija prěvoditeljev i prěkladateljev (https://www.jtpunion.org/en/) v prělěpoj komnatě slovjanskyh narodov (fotografije na koncu tutogo teksta).

Govorimy jezyk tutoj sustrěči byl toliko medžuslovjansky. Praktično besědovalo se toliko v medžuslovjanskom jezyku i tako učilo se pet novyh ljudij interesujučih se do medžuslovjanskogo jezyka, aby stali se aktivnymi govoriteljami. Učestniki koristili internet, i ješče iměli tiskany učebnik (papirovu knigu) medžuslovjanskogo jezyka i pomočne tablice s gramatikoju. Do besědovanja takože byli priključeni on-lajn gosti iz različnyh krajin světa. Vsih učestnikov bylo 18 (osmnadset), 8 (osm) na městu v Pragě i 10 (deset) na onlajnu iz Čehije, Poljsky, Němcije, Burjatije, Finlandije, Hrvatije, Srbije, Ukrajiny i Russije.

Program sostojal se iz četyrěh blokov, vsekaky blok iměl 90 (devetdeset) minut: Dva bloky byli prěd obědom, i dva bloky byli poslě oběda. Prve dva bloky byly lekcije medžuslovjanskogo jezyka (gramatika, slovnik, morfologija, različne sověty, i znajeme grěšky novyh govornikov, ...) od trěh učiteljev (Roberto, Vojta, i Tima) na městu s pomočju Jana van Steenbergena na onlajnu. Potom, poslě oběda na tretjem bloku, učeniki prigotovili svoje prezentacije v formě pribl. 5-10 (pet-deset) minut teksta, i konečno na četvrtom bloku, učeniki koristili svoje prigotovjene teksty i besědovali s govornikami medžuslovjanskogo jezyka na onlajnu, odpovědali na različne pytanija, i tako slušali medžuslovjansky jezyk od dobryh govornikov iz različnyh krajin, ktoryh znajut iz podkastov i jutjub video i drugyh medžuslovjanskyh internetovyh kanalov.

S velikoju radostju možemo povědati, že vtory medžuslovjansky denj uspěl i dosegnul svoj cělj razširiti znanje o projektu medžuslovjanskogo jezyka. Novi učeniki praktično poznali možnosti medžuslovjanskogo jezyka do komunikacije medžu govoriteljami iz različnyh narodov. Mnogo děkujemo panu Petru Kautskomu iz družstva Češska unija prěvoditeljev i prěkladateljev za možnost organizovati vtory medžuslovjansky denj i širiti informacije o projektu medžuslovjanskogo jezyka. Takože jest nam mnogo milo děkovati za veliku pomoč vsim subesědnikam na onlajnu, ktori mnogo pomogli do uspěha medžuslovjanskogo dnja davajuč novym členam medžuslovjanskoj občiny prvu možnost kvalitetnogo praktikovanja medžuslovjanskogo jezyka. Nehaj medžuslovjanska sila bude s vami!

učestniki medžuslovjanskogo dnja

učitelji na městu

Roberto Lombino (Čehija)
Tima Zagorski (Russija)
Vojta Merunka (Čehija)

učeniki na městu

Oleg Riefert (Němcija, došel do Pragy avtom iz grada Nürnberg)
Mihailo Ovčarov (Ukrajina, tutčas univerzitetny student v Pragě)
Aјur Čimitcyrenov (Burjatija, tutčas univerzitetny student v Pragě)
Bator Darmajev (Burjatija, tutčas univerzitetny student v Pragě)
Vladyslav Storoženko (Ukrajina, univerzitetny tutčas student v Pragě)

govorniki MS jezyka na onlajnu

Jan van Steenbergen (Holandija)
Mito Matija (Hrvatija)
Aleksy Bernat (Poljska)
Jaroslav Serhějev (Ukrajina)
Georg Jähnig (Němcija)
Filip Kovčin (Srbija)
Maciej Milach (Poljska)
Konstantin Đorđević (Srbija)
Emil Anton (Finlandija)
Maksim Koroljkov (Russija)