Lod blaznov (korab blaznov)

kategorija: KULTURA - OBČINA - HISTORIJA
datum: 2025-01-02, avtor: aVM

Lod blaznov (korab blaznov) jest alegoričny obraz Hieronyma Boscha (jeronima bosa) iz konca 15-ogo (petnadsetogo) stolětja. Obraz možno byl jednoj čestju triptiha (trěh obrazov na jednu temu) i možno byl ilustracijeju k satiričnoj poeziji s ravnym imenem Korab blaznov od Sebastiana Branta.

Obraz prědstavuje motiv blaznjenja i zlyh ljudskyh črt kako grěšnost, obžerstvo i druge v formě različnyh simbolov kritizujučih moralnost srědnjevěčnogo spoločenstva odvračajučego se od duhovnyh cěnnostij i bezsmysnost takogo postupanja:

  1. Ljudi na korabu pěvajut okolo pšeničnoj lepenice, ktora visi na stolpu koraba, i sluhajut muziku od igrajučih na ljutnje monaha i monašky.
  2. Korab imaje nedostatočno upravjanje od velikoj drěvnoj ložky iz kuhnje, ktoru bezstaranno drži člověk neinteresujuči se do trasy putovanja ale do pšeničnoj lepenice ravno kako vsi drugi ljudi na korabu.
  3. Stolp koraba jest odrubanym drěvom mudrosti, na ktorom visi pečeny gus, ktorogo jedin člověk hoče odrězati nožom aby pojedati.
  4. Grěh obžerstva izobražaje bljuvajuči do vody člověk, u ktorogo visi ryba.
  5. Na stolpu koraba razvěvaje se osmanska zastava, do ktoroj nikto ne interesuje se.
  6. V vodě okolo koraba plavajut goli ljudi, ktori gorlivo čekajut na odpadanje jediva i hočut priklučiti se k radujučim se ljudam na korabu.
  7. Vysoko na stolpu jest ukryta mudra sova, ktora jedina znaje zlu budučnost na korabu putujučih ljudij.

Tutoj vyše od 500 (petsto) lět stary obraz postojanno imaje svoju mističnu silu, zatože i dnes naše državy i občiny upravjajut ljudi podobni blaznam na korabu, ktoryh poddrživaje velika publika podobnyh plavajučim v vodě ljudij.

Nehaj do novogo lěta 2025 ne budemo pesimistični, ale inspirujemo se od staroj mudrosti. Budemo li držeti pravy kurs, zaměnjati ignoranciju i egoizm za ljubu, solidarnost i duhovny rast, potom možemo razumno upravjati svoje životy. Každy iz nas može domysliti svoje postupanje i priložiti malenky kamenjek k velikomu mostu do lučšego světa. Nehaj novo lěto 2025 nam bude dobrym korabom.


Lod blaznov od Hieronyma Boscha



QR-kod članka