Podkast medžuslovjanske novosti i kako do njego učestvovati

kategorija: RAZLIČNO
datum: 2023-05-09, avtor: redakcija

Naš server od dnes imaje takože zvukovy podkast Medžuslovjanske novosti, ktory jest dostupny iz tutoj stranice: https://interslavic.news/podkast i bude dopolniti pisane informacije na tutom serveru. Plan jest dělati kratke priblizno od dvadeseti (20) do trideseti (30) minut zvukove besědy na različne aktualne temy iz života medžuslovjanskoj komunity. Budemo prizyvati gostev, aby oni sami pogovorili, čto dělajut i čto jest jim interesno.

Medžuslovjansky jezyk jest kolaborativny projekt upravjany od dobrovoljcev naměrjeny do budučnosti. Medžuslovjansky jezyk ne služi instrumentom nostalgije po mitičnoj historiji, i ne izražaje političny panslavizm ni sentiment protiv modernoj civilizaciji, ale pomagaje vyše dobromu znanju i razuměnju slovjanskyh narodov medžu soboju, i da by slovjanske narody takože i v budučem ostavali na prvoj liniji vozhoda člověčstva. Prizyvajemo Vas rabotati zajedno s nami, kontaktujte nas na adresě redakcija@interslavic.news, i pomagajte razvoju i praktičnomu širjenju medžuslovjanskogo jezyka.

Blagodarjenje

Na prvom podkastu (2023.05.03) učestvovali vysoko cěnjeni gosti gospodža Alla Sokolova iz russkogo grada Moskva, pan Mito Matija iz hrvatskogo grada Osijek, i pan Zdeněk Kučera, ktory žije v malom selu nedaleko češskogo grada Františkovy Lázně. Redaktorami byli pan Roberto Lombino i Vojta Merunka. Velika hvala i čest našim gostam za ogromnu pomoč pri gotovjenju scenarija i prověrjenje naših tehnologij, čto dalo nam dobru možnost dělanja medžuslovjanskyh podkastov.

Kako redakcija dělaje podkast s našimi gostami?

Prvy kontakt gostev s redaktorami jest črěz e-mail redakcija@interslavic.news ili različne socialne sěti (Discord, Facebook Messenger, VKontakte, Telegram, Signal …).
Redakcija potom dogovorjenym učestnikam bude prigotoviti tekstovy Google Dokument, do ktorogo vsi zajedno pišut slovo-po-slovu točny scenarij, čto bude se govoriti, i k tomu budut prigotovjene prostor na Google Drive i onlajn strěčenje na Google Meet, ktore testujut se i služet kako komunikačne instrumenty.
Kogda jest scenarij gotovy, redakcija dělaje oficijalno onlajn strěčenje na Google Meet, kde každy iz učestnikov trěbuje do svojego komputera pisati svoj oddělny (samostojny) čisty zvukovy fajl, ktory potom bude vložiti do prostora na Google Drive, aby redakcija iměla tutoj zvukovy fajl. Onlajn iz Google Meet takože avtomatično piše se kako MP4 fajl do prostora na Google Drive, aby redakcija ješče iměla sinhronizačny skelet podkasta.
Kogda sut vse zvukove fajly vložene i prověrjene v prostoru na Google Drive, potom redakcija striže i směšivaje konečnu formu podkasta iz sinhronizačnogo skeleta fajla MP4 i vsih zvukovyh fajlov. Gotovy podkast imaje toliko zvuk bez video obraza.

Tuto znači, že učestniki podkasta (redaktori i gosti) mogut byti od sebe daleko, i dělajuči podkast učestniki mogut byti svezani do redakcije toliko črěz onlajn Google Meet.

Prizvanym gostam prěporučaje se koristiti kvalitetny mikrofon i softver, ktory zapisyvaje zvuk ljudskogo govora v nekomprimovanom formatu fajla WAV/PCM frekvenčnogo obsega 44.1 kHz prinajmenje od 30 Hz do 16 kHz, napriměr někaky kondenzatorovy mikrofon s kardioidnoju harakteristikoju, da by zvukovy zapis dobro bral od gosta čisty govor i smenšil razlišne šumy i bezpokojne zvuky iz jegovoj okolice.

Takože prizvanym gostam prěporučaje se iměti na ušah slušalky, aby zvuky drugyh učestnikov onlajna iz pomočnogo onlajna Google Meet byli slyšene toliko gostami, ale ne byli slyšene do kvalitetnogo mikrofona, ktory trěbuje zapisyvati toliko čisty govor gosta bez měšanja s zvukami od drugyh učestnikov onlajn strěčenja.

dělanje podkasta - prěporučana konfiguracija učestvujučego gosta

QR-kod članka