Začto něktore krajiny prazdnujut konec II. světovoj vojny 9-ogo Maja ale druge krajiny 8-ogo Maja?

kategorija: KULTURA - OBČINA - HISTORIJA
datum: 2023-05-03, avtor: aVM

Nacističska Němcija podpisala bezuslovnu kapitulaciju uže 7-ogo Maja 1945 v gradu Remeš, Francija. Za Němciju podpisal glavny načelnik general Jodl, za Sovětsky sovez podpisal general Susloparov, za zapadne sovezniky podpisal general Smith i kako svědok ješče francijsky general Sevez. V tekstu bylo dogovorjeno, že němcijske oružne sily budut končiti svoje bojove aktivnosti do 8-ogo Maja 1945 23:01 srědnoevropskoj časiny, budut ostati na svojih pozicijah, i ne budut niščiti svoju vojensku tehniku.

Časina 8-ogo Maja 1945 23:01 srědnoevropskoj zony jest identična s časinoju 9-ogo Maja 1945 01:01 onogdašnoj moskovskoj zony, čto znači, že v ravnom momentu v Berlinu, Parižu, Pragě… byl osmy Maj 59 minut prěd polunočju do devetogo Maja, ale ravnočasno v Moskvě uže byl devety Maj 61 minut poslě polunoči od osmogo Maja. Različnost časin i datumov identičnogo momenta vidženogo iz pozicije srědnoj Evropy ili vidženogo iz pozicije Moskvy dělaje rotacija planety Zemje od zapada do vzhoda.

Na žalost trěba pripominati, že boje s němečskymi oružnymi silami prodolžali se ješče několiko dnjev poslě naznačenoj kapitulaciji. Červena armija došla do Pragy jutrom 9-ogo Maja. Poslědna bitva Vtoroj světovoj vojny v Evropě byla u sěla Slivice nedalego češskyh gradov Milín i Příbram 11-ogo i 12-ogo Maja 1945. V tutoj bitvě u Slivice bojevalo šest tyseč němečskyh vojinov iz korpusov Wehrmachta i SS protiv sovětskym vojinam iz trěh ukrajinskyh frontov s pomočju američskyh vojinov XII. (dvanadsetogo) korpusa i češskyh partyzanov.

Obače tomu, že Němcija sedmogo Maja podpisala bezuslovnu kapitulaciju postanovjenu na srědnoevropsky osmy Maj, ne vsi členi korpusov Wehrmachta i SS poddali se, i položili svoje oruženja. Najmě němečska armija Mitte razměstjena v Čehiji vzhodno od Pragy bojevala dalje, zatože jejin načelnik general Schörner (Šerner) komandoval, aby probili se od Červenoj armije i poddali se američskoj armiji, ktora byla nedaleko v zapadnoj Čehiji u grada Plzeň.

Vtora světova vojna mimo Evropu končila pozdněje poslě pobědy nad Japonijeju, kde kromě američskoj armije v koncu vojny takože bojevala Červena armija. Japonsky cěsar Hirohito oglasil kapitulaciju 15-ogo Avgusta 1945 poslě atomnogo bombardovanja gradov Hirošima i Nagasaki, ale kapitulacija byla oficijalno podpisana až 2-ogo Septembra 1945.

V Rossiji ne koristaje se nazvanje Vtora světova vojna ale Velika otečstvena vojna, ktora počela se atakom Němcije na Sovětsky sovez 22-ogo Juna 1941 i končila kapitulacijeju Němcije v Maju 1945. Ale Vtora světova vojna počela se dvě lěta skorěje, kogda 1-ogo Septembra 1945 Němcija atakovala Poljsku, ktoroj ozemje iz vozhoda 17-ogo Septembra 1939 takože bral Sovětsky sovez. Sovětsky sovez takože bojeval lěta 1940 s Finladijeju i ješče zahvatil pribaltičske republiky, čto takože ne pričisljuje se do časa Velikoj otečstvenoj vojny, ale do časa Vtoroj svetovoj vojny pričisljuje se podobno kako sovětsko-japonske bitvy na dalekom vostoku v Avgustu 1945.


Dokument kapitulacije nacističnoj Němcije

Pamětnik poslědnoj bitvy II. světovoj vojny v Evropě od 11-ogo do 12-ogo Maja 1945, bitva u Slivice nedaleko grada Milín v Čehiji



QR-kod članka