MEDŽUSLOVJANSKE NOVOSTIМЕДЖУСЛОВЈАНСКЕ НОВОСТИ
MEDŽUSLOVJANSKE NOVOSTI
I.
1.
Во име Отца и Сына и Светого Духа. Амин.
Vo ime Otca i Syna i Svetogo Duha. Amin.
2.
Вопросы Ивана, апостола и евангелиста, на Тајној вечерји Цєсарства небесного об устројству тутого свєта, и о владару свєта, и об Адаму.
Voprosy Ivana, apostola i evangelista, na Tajnoj večerji Cěsarstva nebesnogo ob ustrojstvu tutogo světa, i o vladaru světa, i ob Adamu.
3.
Јесм Иван, брат ваш, учествујучи в мученју, и в Цєсарству Божјем дља себе удєла очекывајучи, кторы на Тајној вечерји наклонил главу своју над грудју Исуса Христа, Господа нашего, и сказал: «Господине, кто буде прєдати тебе?» И Господь одповєдал мнє: «Тој, кто разом со мноју буде опушчати руку в бљудо, и Сатана буде војдти в њего, тој буде прєдати мене».
Jesm Ivan, brat vaš, učestvujuči v mučenju, i v Cěsarstvu Božjem dlja sebe uděla očekyvajuči, ktory na Tajnoj večerji naklonil glavu svoju nad grudju Isusa Hrista, Gospoda našego, i skazal: «Gospodine, kto bude prědati tebe?» I Gospod odpovědal mně: «Toj, kto razom so mnoju bude opuščati ruku v bljudo, i Satana bude vojdti v njego, toj bude prědati mene».
II.
1.
И сказал ја: «Господине, прєдже, чем падл Сатана, в којеј славє прєбывал он подле Отца?»
I skazal ja: «Gospodine, prědže, čem padl Satana, v kojej slavě prěbyval on podle Otca?»
2.
И сказал Господ: меджу честностами небес и водле прєстола Отца незримого и был управитељем над всими. И ја сєдєл подле Отца мојего. Управјал он честностами небесными, и тыми, кто слєдовал за Отцом. И сходил с небес до самого подземного свєта, и возходил к самому трону Бога-Отца невидимого, и охрањал ту славу, ктора была над всеми небесами.
I skazal Gospod: medžu čestnostami nebes i vodle prěstola Otca nezrimogo i byl upraviteljem nad vsimi. I ja sěděl podle Otca mojego. Upravjal on čestnostami nebesnymi, i tymi, kto slědoval za Otcom. I shodil s nebes do samogo podzemnogo světa, i vozhodil k samomu tronu Boga-Otca nevidimogo, i ohranjal tu slavu, ktora byla nad vsemi nebesami.
3.
И замыслил поставити прєстол свој над облаками и быти подобным Всевышњему. И послє он сошел на воздух, нашел ангела, сєдечего над воздухом и сказал јему: «Отвори мнє врата воздуха». И отворил јему.
I zamyslil postaviti prěstol svoj nad oblakami i byti podobnym Vsevyšnjemu. I poslě on sošel na vozduh, našel angela, sědečego nad vozduhom i skazal jemu: «Otvori mně vrata vozduha». I otvoril jemu.
4.
И, спустивши се пониж, нашел ангела, кторы чувал воды, и сказал јему: «Одкрыj мнє врата вод». И одкрыл јему.
I, spustivši se poniž, našel angela, ktory čuval vody, i skazal jemu: «Odkryj mně vrata vod». I odkryl jemu.
5.
И, спустивши се јешче пониж, узрєл всу земју, покрыту водами, и, ходечи по низу, нашел двох рыб, лежечих над водоју, и кторе были како бы заједно држечими всу земју по указанју Отца Невидимого.
I, spustivši se ješče poniž, uzrěl vsu zemju, pokrytu vodami, i, hodeči po nizu, našel dvoh ryb, ležečih nad vodoju, i ktore byli kako by zajedno držečimi vsu zemju po ukazanju Otca Nevidimogo.
6.
И, спустивши се јешче пониж, увидєл велике облакы, кторе држели морје морјеј.
I, spustivši se ješče poniž, uviděl velike oblaky, ktore drželi morje morjej.
7.
И спустил се он јешче ниже, и одкрыл свој подземны свєт, кторы је Пекло огњено. А послє уж не смогл он спустити се јешче ниже, вслєд пламења огња, горечего тамо.
I spustil se on ješče niže, i odkryl svoj podzemny svět, ktory je Peklo ognjeno. A poslě už ne smogl on spustiti se ješče niže, vslěd plamenja ognja, gorečego tamo.
8.
Потом Сатана врнул се назад, наполнивши себе злобами, и возјел се к ангелам, ктори были над воздухом и над водами, и сказал јим: «Все то — моје: јестли будете поддати се мене, буду поставити прєстол над облаками и буду подобны Всевышњему. И буду воздвигнути воды над сводом небесным, и ине воды буду сјединити в велике морја, и послє не буде воды над образом всеј земје. И владати буду с вами во вєкы вєков».
Potom Satana vrnul se nazad, napolnivši sebe zlobami, i vozjel se k angelam, ktori byli nad vozduhom i nad vodami, i skazal jim: «Vse to — moje: jestli budete poddati se mene, budu postaviti prěstol nad oblakami i budu podobny Vsevyšnjemu. I budu vozdvignuti vody nad svodom nebesnym, i ine vody budu sjediniti v velike morja, i poslě ne bude vody nad obrazom vsej zemje. I vladati budu s vami vo věky věkov».
9.
И сказал то ангелам и возимал се до небес аж до третјего неба, свргајучи ангелов Отца Незримого, и говорил каждому тако:
I skazal to angelam i vozimal se do nebes až do tretjego neba, svrgajuči angelov Otca Nezrimogo, i govoril každomu tako:
10.
«Колико јеси имајеш долга прєд Господином својим?» И првы одповєдал: «Сто мєр масла». И сказал Сатана: «Возми потврдженје, сєдај и пиши петдесет». И сказал другому: «А ты колико имајеш долга прєд Господом својим?». И тој одповєдал: «Сто мєр пшеници». И говорил јему Сатана: «Возми потврдженје своје, сєдај и пиши тутчас осмдесет». И возимал се по небесам и тако же говорил ангелам аж до четвртого неба, вводечи в покушенје ангелов невидимого Отца.
«Koliko jesi imaješ dolga prěd Gospodinom svojim?» I prvy odpovědal: «Sto měr masla». I skazal Satana: «Vozmi potvrdženje, sědaj i piši petdeset». I skazal drugomu: «A ty koliko imaješ dolga prěd Gospodom svojim?». I toj odpovědal: «Sto měr pšenici». I govoril jemu Satana: «Vozmi potvrdženje svoje, sědaj i piši tutčas osmdeset». I vozimal se po nebesam i tako že govoril angelam až do četvrtogo neba, vvodeči v pokušenje angelov nevidimogo Otca.
III.
1.
И разнес се глас од прєстола Отца: «Јеси ли, малодушны, дєлајучи то, вводечи в покушенје ангелов Отца? Совршивши грєх, быстро дєлај, что замысљено». I raznes se glas od prěstola Otca:
«Jesi li, malodušny, dělajuči to, vvodeči v pokušenje angelov Otca? Sovršivši grěh, bystro dělaj, čto zamysljeno».
2.
Потом Отец повелєл ангелам својим: «Сојмите јих одєдже, и троны, и вєнци у всих ангелов, послушавших се јего». И однесли ангели одєдже, и троны, и вєнци всих ангелов, послушавших се јего.
Potom Otec povelěl angelam svojim: «Sojmite jih odědže, i trony, i věnci u vsih angelov, poslušavših se jego». I odnesli angeli odědže, i trony, i věnci vsih angelov, poslušavših se jego.
3.
И опет ја, Иван, спросил Господа, сказавши: «Од тој добы, когда падл Сатана, в ктором мєсту он прєбывал?». И Господ одповєдал: «Повелєл Отец мој, и прєобразил јего за прєгордост јего, и взел Он свєтло славы јего, и лице јего стало како желєзо, нажарјено огњем, и цєлы внєшны изглед јего стал како у чловєка, и имал седм хвостов, кторе повлєкли за собоју третји дєл ангелов Бога».
I opet ja, Ivan, sprosil Gospoda, skazavši: «Od toj doby, kogda padl Satana, v ktorom městu on prěbyval?». I Gospod odpovědal: «Povelěl Otec moj, i prěobrazil jego za prěgordost jego, i vzel On světlo slavy jego, i lice jego stalo kako želězo, nažarjeno ognjem, i cěly vněšny izgled jego stal kako u člověka, i imal sedm hvostov, ktore povlěkli za soboju tretji děl angelov Boga».
4.
И одметаны был Сатана од престола Бога и од управјенја небесами.
I odmetany byl Satana od prestola Boga i od upravjenja nebesami.
5.
И сошевши с неба Сатана на своду небесном никому не могл створити мир, вкључајучи тым, кто были с њим. Послє спросил Отца, сказавши: «Согрєшил јесм, пошчеди мене, все буду врнути Тобє». Отец милосрдны сдєлал то и дал покој Сатанє дєлати все, что тој желаје, до седмого дња.
I soševši s neba Satana na svodu nebesnom nikomu ne mogl stvoriti mir, vključajuči tym, kto byli s njim. Poslě sprosil Otca, skazavši: «Sogrěšil jesm, poščedi mene, vse budu vrnuti Tobě». Otec milosrdny sdělal to i dal pokoj Sataně dělati vse, čto toj želaje, do sedmogo dnja.
IV.
1.
И тогда седл Сатана над сводом небесным, и потом повелєл ангелу, кторы владал воздухом, и другому, кторы владал водами, и возвел две чести вод вврх, к воздуху, а из третјеј сдєлал петдесет морјеј. И сдєлал раздєљенје вод по прєдписанју Отца незримого. И опет повелєл ангелу вод: «Встај над двома рыбами», и возвел Сатана взету јим од земје воду и одкрыл се сухы простор.
I togda sedl Satana nad svodom nebesnym, i potom povelěl angelu, ktory vladal vozduhom, i drugomu, ktory vladal vodami, i vozvel dve česti vod vvrh, k vozduhu, a iz tretjej sdělal petdeset morjej. I sdělal razděljenje vod po prědpisanju Otca nezrimogo. I opet povelěl angelu vod: «Vstaj nad dvoma rybami», i vozvel Satana vzetu jim od zemje vodu i odkryl se suhy prostor.
2.
И было тако. Послє взел вєнец од ангела, владајучего воздухом, из једного дєла створил трон собє, а из другого — свєтло Солнца. Потом взел вєнец од ангела, владајучего водами, из једној чести сдєлал свєтло луны, а из другој — свєтло дња. Из камењев создал огоњ, из огња створил все војинство и звєзды, и из њих сдєлал ангелов духов — слуг својих, слєдујучи образу управитељa Всевышњего, послє создал громы и дожде, и град, и снєг, и поставил слуг својих ангелов над њими.
I bylo tako. Poslě vzel věnec od angela, vladajučego vozduhom, iz jednogo děla stvoril tron sobě, a iz drugogo — světlo Solnca. Potom vzel věnec od angela, vladajučego vodami, iz jednoj česti sdělal světlo luny, a iz drugoj — světlo dnja. Iz kamenjev sozdal ogonj, iz ognja stvoril vse vojinstvo i zvězdy, i iz njih sdělal angelov duhov — slug svojih, slědujuči obrazu upravitelja Vsevyšnjego, poslě sozdal gromy i dožde, i grad, i sněg, i postavil slug svojih angelov nad njimi.
3.
Послє повелєл земје, да бы породила всаких живучих створов, звєров, дрєва и травы, и морју повелєл, да бы оно породило рыб и птиц небес.
Poslě povelěl zemje, da by porodila vsakih živučih stvorov, zvěrov, drěva i travy, i morju povelěl, da by ono porodilo ryb i ptic nebes.
V.
1.
И замыслил Сатана створити чловєка в рабство собє, и возвысил грез од земје и создал чловєка, подобного себе. И повелєл ангелу второго неба војдти в тєло из глины, и возјел одтуд и создал ино тєло по образу жены, а послє приказал ангелу првого неба војдти в њего. Много плакали ангели, видечи на собє обликы смртне в разных формах.
I zamyslil Satana stvoriti člověka v rabstvo sobě, i vozvysil grez od zemje i sozdal člověka, podobnogo sebe. I povelěl angelu vtorogo neba vojdti v tělo iz gliny, i vozjel odtud i sozdal ino tělo po obrazu ženy, a poslě prikazal angelu prvogo neba vojdti v nјego. Mnogo plakali angeli, videči na sobě obliky smrtne v raznyh formah.
2.
Послє того сказал Сатана јим совршити дєјанје плотско в тєлах из глины, а они не разумєли, како совршити грєх. Првоначелник грєха својим покушенјем сдєлал то: засадил рајскы сад и введл људиј довнутра, и повелєл јим не једати ничто из њего.
Poslě togo skazal Satana jim sovršiti dějanje plotsko v tělah iz gliny, a oni ne razuměli, kako sovršiti grěh. Prvonačelnik grěha svojim pokušenjem sdělal to: zasadil rajsky sad i vvedl ljudij dovnutra, i povelěl jim ne jedati ničto iz njego.
3.
Диавол вошел в рајскы сад и посадил тростник в центру сада и из слины својеј создал дракона и приказал јему чекати. И тако Диавол утајил сучност својего обмана, да бы не одкрыли лжи јеговој. И вошел он к њим, сказавши: «Једајте всакы плод рајского сада, але плод несправедливости не једајте». Потом злобны Диавол вошел в дракона злого, и обманул ангела, кторы был в образу жены, и излил на јејину главу похоту грєха, и была похота Евы како гореча печ. Тутчасно Диавол в образу дракона уполз в тростник, изполнил похоту своју с Евоју с помочју драконјего хвоста. Вот зачто не называјут се дєтами Бога, але дєтами Диавола и дєтами дракона, желанја отца својего изполњајучи до конца врємени.
Diavol vošel v rajsky sad i posadil trostnik v centru sada i iz sliny svojej sozdal drakona i prikazal jemu čekati. I tako Diavol utajil sučnost svojego obmana, da by ne odkryli lži jegovoj. I vošel on k njim, skazavši: «Jedajte vsaky plod rajskogo sada, ale plod nespravedlivosti ne jedajte». Potom zlobny Diavol vošel v drakona zlogo, i obmanul angela, ktory byl v obrazu ženy, i izlil na jejinu glavu pohotu grěha, i byla pohota Evy kako goreča peč. Tutčasno Diavol v obrazu drakona upolz v trostnik, izpolnil pohotu svoju s Evoju s pomočju drakonjego hvosta. Vot začto ne nazyvajut se dětami Boga, ale dětami Diavola i dětami drakona, želanja otca svojego izpolnjajuči do konca vrěmeni.
4.
Потом Диавол излил своју похоту на главу ангела, бывшего в Адаму, и Адам с Евоју изјавили себе разом в необузданој похотє за породженјем дєтеј Диавола и дракона аж до изчезненја свєта.
Potom Diavol izlil svoju pohotu na glavu angela, byvšego v Adamu, i Adam s Evoju izjavili sebe razom v neobuzdanoj pohotě za porodženjem dětej Diavola i drakona až do izčeznenja světa.
VI.
1.
И потом ја, Иван, спросил Господа, сказавши: «Зачто говорет људи, что Адам и Ева Богом были создани и в рај помєшчени были изполњати повелєнја Јего и из-за прєступанја приказа Отца были сдєлани смртными?» И Господ одповєдал мене: «Слушај, милы Иване, неразумни људи тако говорет од лжи, что Отец мој создал тєла из глины, але Он чрєз Духа Светого создал все небесне честности; сами же они од нарушениј и вслєд паденја одкрыли себе носечими глињане тєла и были сдєлани они смртными».
I potom ja, Ivan, sprosil Gospoda, skazavši: «Začto govoret ljudi, čto Adam i Eva Bogom byli sozdani i v raj poměščeni byli izpolnjati povelěnja Jego i iz-za prěstupanja prikaza Otca byli sdělani smrtnymi?» I Gospod odpovědal mene: «Slušaj, mily Ivane, nerazumni ljudi tako govoret od lži, čto Otec moj sozdal těla iz gliny, ale On črěz Duha Svetogo sozdal vse nebesne čestnosti; sami že oni od narušenij i vslěd padenja odkryli sebe nosečimi glinjane těla i byli sdělani oni smrtnymi».
2.
Једнако ја, Иван, спросил Господа, сказавши: «Господу, којим образом појавјаје се чловєк од духа в тєлу плотском?» И одповєдал мене Господ: «Из падших духов небес нєктори входет в тєла женске глињане и плот пријмајут од похоты плотској и роджаје се дух од духа и плот од плоти, и тако довршаје се влада Сатаны в тутом свєту и во всемиру».
Jednako ja, Ivan, sprosil Gospoda, skazavši: «Gospodu, kojim obrazom pojavjaje se člověk od duha v tělu plotskom?» I odpovědal mene Gospod: «Iz padših duhov nebes něktori vhodet v těla ženske glinjane i plot prijmajut od pohoty plotskoj i rodžaje se duh od duha i plot od ploti, i tako dovršaje se vlada Satany v tutom světu i vo vsemiru».
VII.
1.
И спросил ја Господа, сказавши: «Доколє буде царствовати в тутом свєту Сатана над бытјем људиј?» И одповєдал мнє Господ: «Отец мој дозволил јему владати седм дњев, а то сут седм епох».
I sprosil ja Gospoda, skazavši: «Dokolě bude carstvovati v tutom světu Satana nad bytjem ljudij?» I odpovědal mně Gospod: «Otec moj dozvolil jemu vladati sedm dnjev, a to sut sedm epoh».
2.
И снова ја, Иван, спросил Господа, сказавши: «Како то буде врєме?» И одповєдал он мнє: «Од тој добы, како Диавол одпал од славы Отца и захотел својеј собственој славы и седл он над небесами и послал слуг својих, огоњ горечи, на земју на дол к људам од Адама до Еноха, служитеља јегового. И послал Сатана слугу својего и взел Еноха на свод небесны и показал јему божественост своју, и повелєл јему взети перо и чрнило, и допока сєдєл, написал је 76 книг. И приказал взети јих на земју. Взел Енох с собоју тамте книгы и прєдал људам и научил јих совршати свечене обреды и избирати мєсто дља обредов, и сдєлали все тако и закрыли Цєсарство небесно прєд људами. И говорил Сатана јим: „Гледајте, јесм Бог и немаје иного Бога, кромє мене“».
I snova ja, Ivan, sprosil Gospoda, skazavši: «Kako to bude vrěme?» I odpovědal on mně: «Od toj doby, kako Diavol odpal od slavy Otca i zahotel svojej sobstvenoj slavy i sedl on nad nebesami i poslal slug svojih, ogonj goreči, na zemju na dol k ljudam od Adama do Enoha, služitelja jegovogo. I poslal Satana slugu svojego i vzel Enoha na svod nebesny i pokazal jemu božestvenost svoju, i povelěl jemu vzeti pero i črnilo, i dopoka sěděl, napisal je 76 knig. I prikazal vzeti jih na zemju. Vzel Enoh s soboju tamte knigy i prědal ljudam i naučil jih sovršati svečene obredy i izbirati město dlja obredov, i sdělali vse tako i zakryli Cěsarstvo nebesno prěd ljudami. I govoril Satana jim: „Gledajte, jesm Bog i nemaje inogo Boga, kromě mene“.
3.
Зато послал мене Отец мој в туты свєт, да бы објавити име своје људам и познали бы они јего и злобного Диавола. Когда узнал Сатана, же ја буду пријдти в туты свєт, послал ангела својего и взел дєлы од трех дрєвес и оддал јих Мојисеју-пророку, кторы је нынє мој слуга, да бы разпети на криж, и дрєво то складовано је дља мене понынє. И прєдал он јему божску вољу народу својему и прєдал закон сынам Израеља, и послє изведл јух по сухому простору чрєз срєдину морја».
Zato poslal mene Otec moj v tuty svět, da by objaviti ime svoje ljudam i poznali by oni jego i zlobnogo Diavola. Kogda uznal Satana, že ja budu prijdti v tuty svět, poslal angela svojego i vzel děly od treh drěves i oddal jih Mojiseju-proroku, ktory je nyně moj sluga, da by razpeti na križ, i drěvo to skladovano je dlja mene ponyně. I prědal on jemu božsku volju narodu svojemu i prědal zakon synam Izraelja, i poslě izvedl juh po suhomu prostoru črěz srědinu morja».
VIII.
1.
«Когда замыслил Отец мој послати мене в туты свєт, послал прєдо мноју чрєз Духа Светого ангела, да бы тој пријел мене, а звал се тој ангел Маријеју, матерју мојеју, а ја јесм сошедши на земју чрєз јејино ухо, вошел и изшел.
«Kogda zamyslil Otec moj poslati mene v tuty svět, poslal prědo mnoju črěz Duha Svetogo angela, da by toj prijel mene, a zval se toj angel Marijeju, materju mojeju, a ja jesm sošedši na zemju črěz jejino uho, vošel i izšel.
2.
И узнал Сатана, кнез свєта сего, же ја пришел најдти и спасти то, что је пало, и послал ангела својего Илију-пророка, крестившего в водє, кторого звали Иван Креститељ. А Илија спросил кнеза свєта сего, како буде смогти узнати јего. И сам Сатана одповєдал јему: „Над њим будете узрєти Духа Светого, сошедшего в образу голуба и оставшего се над њим, он је тој, кто крести Духом Светым и огњем“. А говорил тако Ивану, затоже не знал јего. Але тој, кто послал јего крестити в водє, слєдујуче сказал јему. Посвєдчаје Иван: „Ја крешчу водоју ради покајанја, але ины крести вас в Светом Духу в одпушченје грєхов“. Он је тој, кто може губити и спасати».
I uznal Satana, knez světa sego, že ja prišel najdti i spasti to, čto je palo, i poslal angela svojego Iliju-proroka, krestivšego v vodě, ktorogo zvali Ivan Krestitelj. A Ilija sprosil kneza světa sego, kako bude smogti uznati jego. I sam Satana odpovědal jemu: „Nad njim budete uzrěti Duha Svetogo, sošedšego v obrazu goluba i ostavšego se nad njim, on je toj, kto kresti Duhom Svetym i ognjem“. A govoril tako Ivanu, zatože ne znal jego. Ale toj, kto poslal jego krestiti v vodě, slědujuče skazal jemu. Posvědčaje Ivan: „Ja krešču vodoju radi pokajanja, ale iny kresti vas v Svetom Duhu v odpuščenje grěhov“. On je toj, kto može gubiti i spasati».
IX.
1.
И опет ја, Иван, спросил Господа: «Може ли чловєк имати спасенје чрєз крешченје Ивана Креститеља без твојего крешченја?» И одповєдал Господ: «Без мојего крешченја, кторо је крешченје дља одпушченја грєхов, говорју једно, да никто не буде смогти изискати спасенје Божје, и изискати хлєб житја, оказавши се в Цєсарству небесном, ибо тамте, кто једаје плот моју и пије кров моју, да будут они называны дєтами Бога». И спросил ја Господа: «Что то је плот твоја и что то је кров твоја?»
I opet ja, Ivan, sprosil Gospoda: «Može li člověk imati spasenje črěz kreščenje Ivana Krestitelja bez tvojego kreščenja?» I odpovědal Gospod: «Bez mojego kreščenja, ktoro je kreščenje dlja odpuščenja grěhov, govorju jedno, da nikto ne bude smogti iziskati spasenje Božje, i iziskati hlěb žitja, okazavši se v Cěsarstvu nebesnom, ibo tamte, kto jedaje plot moju i pije krov moju, da budut oni nazyvany dětami Boga». I sprosil ja Gospoda: «Čto to je plot tvoja i čto to je krov tvoja?»
2.
И одповєдал мнє Господ: «Прєдже, чем падл Диавол с великыми војинствами ангелов Отца, ангели Отца возносили хвалу Отцу мојему чрєз молитву, говоречи: „Отче наш, кторы јеси на небесах“. И пєванје то возходило аж до прєстола Отца. Але ангели, кторе падли, уж на могли славити Отца чрєз пєванје».
I odpovědal mně Gospod: «Prědže, čem padl Diavol s velikymi vojinstvami angelov Otca, angeli Otca voznosili hvalu Otcu mojemu črěz molitvu, govoreči: „Otče naš, ktory jesi na nebesah“. I pěvanje to vozhodilo až do prěstola Otca. Ale angeli, ktore padli, už na mogli slaviti Otca črěz pěvanje».
3.
И поновно спросил ја Господа: «Како вес всемир пријел крешченје Креститеља, а твоје не вси пријмајут?». Одповєдал мнє Господ: «Зато, же дєла јих злы и не идут они к свєтлу. Послєдоватељи Ивана Креститеља сут ожењени и омужени, моји приврженци сут неожењени и неомужени, и подобны они ангелам Бога на небу в Цєсарству небесном». И сказал ја: «Јестли познанје жены је грєх, то некористно људам женити се и омужати се». И Господ согласил се: «Не вси пријмајут слово то, само тамте, кторым оно је дано. Ибо сут скопци, роджени тако од лона матери, а сут скопци, кторых сдєлали такыми ини људи, а јешче сут таки људи, ктори будут оскопити себе ради Цєсарства Божјего. Кто може пријети то, нехај пријмаје».
I ponovno sprosil ja Gospoda: «Kako ves vsemir prijel kreščenje Krestitelja, a tvoje ne vsi prijmajut?». Odpovědal mně Gospod: «Zato, že děla jih zly i ne idut oni k světlu. Poslědovatelji Ivana Krestitelja sut oženjeni i omuženi, moji privrženci sut neoženjeni i neomuženi, i podobny oni angelam Boga na nebu v Cěsarstvu nebesnom». I skazal ja: «Jestli poznanje ženy je grěh, to nekoristno ljudam ženiti se i omužati se». I Gospod soglasil se: «Ne vsi prijmajut slovo to, samo tamte, ktorym ono je dano. Ibo sut skopci, rodženi tako od lona materi, a sut skopci, ktoryh sdělali takymi ini ljudi, a ješče sut taki ljudi, ktori budut oskopiti sebe radi Cěsarstva Božjego. Kto može prijeti to, nehaj prijmaje».
X.
1.
Послє спросил ја Господа о Дње Суда: «Које прєдвєстје буде о приходу твојем?» И одповєдал Господ: «Когда число праведников буде сравњати се с числом павших вєнцев».
Poslě sprosil ja Gospoda o Dnje Suda: «Koje prědvěstje bude o prihodu tvojem?» I odpovědal Gospod: «Kogda čislo pravednikov bude sravnjati se s čislom pavših věncev».
2.
Тогда Сатана буде освободити се из темници својеј, имајучи бєсност велику, и буде начети војну против справедливости. И будут воззвати к справедливости Господа Бога својего.
Togda Satana bude osvoboditi se iz temnici svojej, imajuči běsnost veliku, i bude načeti vojnu protiv spravedlivosti. I budut vozzvati k spravedlivosti Gospoda Boga svojego.
3.
Тутчасно буде повелєти Господ Бог архангелу, да бы тој протрубил в трубу, и звук трубы архангелској буде разнести се с небес и буде то слышно аж до Пекла.
Tutčasno bude povelěti Gospod Bog arhangelu, da by toj protrubil v trubu, i zvuk truby arhangelskoj bude raznesti se s nebes i bude to slyšno až do Pekla.
4.
Тогда буде помрачити се Солнце, и Луна не буде давати свєтло своје, и звєзды будут пасти с небес.
Togda bude pomračiti se Solnce, i Luna ne bude davati světlo svoje, i zvězdy budut pasti s nebes.
5.
И будут сорвати се с основ својих четыри вєтра великых, и будут сотрести се земја и морје, и горы, и холмы једноврємено.
I budut sorvati se s osnov svojih četyri větra velikyh, i budut sotresti se zemja i morje, i gory, i holmy jednovrěmeno.
6.
Тогда буде јавити се знаменје Сына. И будут выти и возклицати вси народи земје. Недвижно небо буде сотрести и сокрыти се, и Солнце буде свєтити до деветого часа.
Togda bude javiti se znamenje Syna. I budut vyti i vozklicati vsi narodi zemje. Nedvižno nebo bude sotresti i sokryti se, i Solnce bude světiti do devetogo časa.
7.
Тогда буде пријти Сын Чловєчскы во славє својеј, а с њим вси свети и ангели, и буде поставити прєстол над небесами, и буде сєдєти на трону славы својеј с дванадесетју апостолами, сєдечими на дванадесети тронах славы својеј. И будут јавјене книгы и будут судити вси народы земје. Тогда прєдначртано буде изполнити се.
Togda bude prijti Syn Člověčsky vo slavě svojej, a s njim vsi sveti i angeli, i bude postaviti prěstol nad nebesami, i bude sěděti na tronu slavy svojej s dvanadesetju apostolami, sědečimi na dvanadeseti tronah slavy svojej. I budut javjene knigy i budut suditi vsi narody zemje. Togda prědnačrtano bude izpolniti se.
8.
Потом Сын Чловєчскы буде послати својих ангелов и будут они собрати избранных јего од вршин небес и до нижных границ јих. И будут привести всих избранных мојих на стрєтенје моје на облакы на воздуху.
Potom Syn Člověčsky bude poslati svojih angelov i budut oni sobrati izbrannyh jego od vršin nebes i do nižnyh granic jih. I budut privesti vsih izbrannyh mojih na strětenje moje na oblaky na vozduhu.
9.
Послє Сын Чловєчскы буде свргнути демонов злых и буде изгнати јих с љутостју, и вси народи, ктори вєрили в Сатану… и они будут пријти… и ктори будут сказати: «Да будемо једати и пити», и будут вратити одтуд, ктори они сут. И будут увидєти, ктору корист им дало то.
Poslě Syn Člověčsky bude svrgnuti demonov zlyh i bude izgnati jih s ljutostju, i vsi narodi, ktori věrili v Satanu… i oni budut prijti… i ktori budut skazati: «Da budemo jedati i piti», i budut vratiti odtud, ktori oni sut. I budut uviděti, ktoru korist im dalo to.
10.
И тутчасно вси народи покорно будут прєдстати прєд судом. И будут јавити се двє книгы и будут оне показати всим народам вырок јих, и будут праведни прославјени за трпєнје своје и дєла добре. Чест и слава тым, кто сочувал ангелскы образ житја и преносившим брємена, окрутност и злобу, и нуджу и негодованје прєживавшим.
I tutčasno vsi narodi pokorno budut prědstati prěd sudom. I budut javiti se dvě knigy i budut one pokazati vsim narodam vyrok jih, i budut pravedni proslavjeni za trpěnje svoje i děla dobre. Čest i slava tym, kto sočuval angelsky obraz žitja i prenosivšim brěmena, okrutnost i zlobu, i nudžu i negodovanje prěživavšim.
11.
И буде оддєлити Сын Чловєчскы праведников својих од грєшников, сказавши јим: «Идите, благославјајеми Отцом мојим, да будете пријети цесарство ваше, уготовано вам од основанја свєта». И послє буде сказати грєшникам: «Одојдите од мене, злословечи, в огоњ вєчны, уготованы Диаволу и ангелам јего». И ини будут увидєти послєдње раздєљенје, и како грєшники будут одправјени в Пекло.
I bude odděliti Syn Člověčsky pravednikov svojih od grěšnikov, skazavši jim: «Idite, blagoslavjajemi Otcom mojim, da budete prijeti cesarstvo vaše, ugotovano vam od osnovanja světa». I poslě bude skazati grěšnikam: «Odojdite od mene, zlosloveči, v ogonj věčny, ugotovany Diavolu i angelam jego». I ini budut uviděti poslědnje razděljenje, i kako grěšniki budut odpravjeni v Peklo.
12.
И, напослєд, по воље Отца из темниц будут изходити души невєречих. И будут услышати глас мој, и будут једна овчарња и једин пастух. И тогда по воље Отца будет изходити из подземного свєта тма тењиј и Пекло огњено и все од нижној земје до свода небесного в воздуху буде в огњу…
I, naposlěd, po volje Otca iz temnic budut izhoditi duši nevěrečih. I budut uslyšati glas moj, i budut jedna ovčarnja i jedin pastuh. I togda po volje Otca budet izhoditi iz podzemnogo světa tma tenjij i Peklo ognjeno i vse od nižnoj zemje do svoda nebesnogo v vozduhu bude v ognju…
13.
Како бы чловєк возрастом тридесет лєт буде подбрати камењ и бросити вниз, једва ли чрєз три года буде достигнути дна — така је глубина бездны и огња, кде будут прєбывати грєшники.
Kako by člověk vozrastom trideset lět bude podbrati kamenj i brositi vniz, jedva li črěz tri goda bude dostignuti dna — taka je glubina bezdny i ognja, kde budut prěbyvati grěšniki.
XI.
1.
И тогда буде свезани Сатана и все војинство јего, и буде брошени в бездну огња. И буде сходити Сын Божји к избранным јего со свода небесного.
I togda bude svezani Satana i vse vojinstvo jego, i bude brošeni v bezdnu ognja. I bude shoditi Syn Božji k izbrannym jego so svoda nebesnogo.
2.
И буде ввргати Диавола в крєпке неразрывајеме оковы заједно с грєшниками. Плачучи и скрбечи будут сказати: «Проголтај нас, земјо, и укрој нас смртју».
I bude vvrgati Diavola v krěpke nerazryvajeme okovy zajedno s grěšnikami. Plačuči i skrbeči budut skazati: «Progoltaj nas, zemjo, i ukroj nas smrtju».
3.
И тогда праведники будут блєстєти како Солнце в цєсарству Отца мојего. И буде привести јих к прєстолу Отца незримого, сказавши: «Вот ја и дєти моји, кторых дал мнє Бог. О праведны, свєт тебе не познал, а ја познал тебе в истинности, затоже ты мене послал».
I togda pravedniki budut blěstěti kako Solnce v cěsarstvu Otca mojego. I bude privesti jih k prěstolu Otca nezrimogo, skazavši: «Vot ja i děti moji, ktoryh dal mně Bog. O pravedny, svět tebe ne poznal, a ja poznal tebe v istinnosti, zatože ty mene poslal».
4.
И тогда буде одповєдати Отец Сыну својему, сказавши: «Сыне мој драгы, сєдај десно од мене, допока не буду свргнути врагов твојих к подножју трона твојего, ктори одвргали мене и говорили: „Јесмо боги, и кромє нас немаје иного Бога“, ктори пророков твојих мучили до смрти и праведников твојих прогањали. И ты будеш прогањати јих во тму внєшњу, тамо буде плач и скрипєнје зубовно».
I togda bude odpovědati Otec Synu svojemu, skazavši: «Syne moj dragy, sědaj desno od mene, dopoka ne budu svrgnuti vragov tvojih k podnožju trona tvojego, ktori odvrgali mene i govorili: „Jesmo bogi, i kromě nas nemaje inogo Boga“, ktori prorokov tvojih mučili do smrti i pravednikov tvojih proganjali. I ty budeš proganjati jih vo tmu vněšnju, tamo bude plač i skripěnje zubovno».
5.
И тогда буде сести Сын Божји десно од Отца својего и буде Отец повелєти ангелам својим, и буде повести јих, и буде разставити јих в хоры ангелске, да бы одєти јих облаченјами нетлєјемыми, и буде јим дати вєнце неуведајеме и прєстолы непорушиме.
I togda bude sesti Syn Božji desno od Otca svojego i bude Otec povelěti angelam svojim, i bude povesti jih, i bude razstaviti jih v hory angelske, da by oděti jih oblačenjami netlějemymi, i bude jim dati věnce neuvedajeme i prěstoly neporušime.
6.
И буде Бог в срєдинє, и не будут боље прєживати ни глад, ни жеджу, и не буде зајдти Солнце над њими, и никторы жар не будут прєживати и буде Бог изтрети все солзы из очиј јих.
I bude Bog v srědině, i ne budut bolje prěživati ni glad, ni žedžu, i ne bude zajdti Solnce nad njimi, i niktory žar ne budut prěživati i bude Bog iztreti vse solzy iz očij jih.
7.
И будет владати Сын с јего Отцом светым, и цєсарство то не буде кончити во вєкы вєков.
I budet vladati Syn s jego Otcom svetym, i cěsarstvo to ne bude končiti vo věky věkov.
8.
Тут кончаје се тајна книга кривовєрцев из Конкорецо, прєнесена из Булгарије Назаријем, бискупом јих, полна заблуд.
Tut končaje se tajna kniga krivověrcev iz Concorezzo, prěnesena iz Bulgarije Nazarijem, biskupom jih, polna zablud.
QR-kod članka
RSS kanal
