MEDŽUSLOVJANSKE NOVOSTIМЕДЖУСЛОВЈАНСКЕ НОВОСТИ
MEDŽUSLOVJANSKE NOVOSTI
Subotoju 9-ogo septembra 2023 od 9:00 časiny bude odbyvati se medžunarodny festival domorodnyh tradicij Rodokruh 2023 (češsko slovo rodokruh znači krug roda, rodokrug). Festival organizuje češsko družstvo s festivalom ravnym imenem Rodokruh, ktoro uže podobny festival organizovalo prošle lěta (tu možete čitati naš članok iz goda 2022 i viděti fotografije: https://interslavic.news/index?clanok=88). Festival odbyval se v prostorah ranča Andy West Ranch, ktory jest pod bazaltovym vrhom Kunětická hora (gora) ležučim v nizině rěky Labe približno jedno sto kilometrov vozhodno od Pragy. Kuněticka gora jest mitično staroslovjansko i takože keltsko město, kde v davnom věku byli različne svetilišča naših prědkov i nyně tamo stoji dobropoglědny srědnověčny zamok.
Festival bude od 9:00 časiny počinati se ritualom v medžuslovjanskom jezyku pod rukovodstvom pana Zdeněka Ordelta. Prigotovjeny tekst rituala možete čitati na koncu tutogo članka.
Potom budut vystupati s lekcijami:
– Vojtěch Merunka – medžuslovjansky jezyk
– Áda Inneman – české prameny, J.A. Komenský
– Ištabela Barela – simbolika prirody
– Zdeněk Ordelt – obnovjenje domačnyh slovjanskyh tradicij
– Adam Vokáč – poslědny slěd
– Petr Matuška – duhovny prostor
– Tereza Laibnerová – ritualy prěhodov
– Petr Kohl – lěkarstvo Vuhan gongami
– i ješče druge interesne prezentacije
Muzika na festivalu bude:
– igra na kristalne misky
– didžedridy
– buben svobody „steel drum“
– bubnovanje, kitara
– Vuhan gongy
Tancevanje na festivalu bude:
– krugovo tancevanje
– horovody
Dalje na festivalu bude možno aktivno učestvovati do različnyh majstrovskyh umětnostij i trgovin s jedivom i osvěženjem, čajami i bylinami, prirodnym lěkarstvom, ljudovym hudožstvom ...
Považeni pridruženi, prizyvaju vas, držimo se rukami i propojimo se do krugu Solnca.
Ej vy voznešeni ohranitelji našego prostora, s pokornostju i uvažanjem,
privitajte vsih na tutom obredu, ktory povezuje nas s duhom naših rodov,
s duhom materi Zemje, s duhom zemje češskoj, zemje moravskoj, zemje slezskoj,
s duhom cěloj Evropy i cěloj našej planety, materi našej zemjskoj.
S považenjem prosimo duha tutyh poljan i lučin, lěsov i potokov,
nehaj donese blagoslovjenje obredu našemu.
Nehaj vsekto do prostora tutogo pristupi, i blagoslovjenje od lěsnyh vil, duhov drěv, prědkov,
kako lětny větr, laskaje rukoju svojeju.
Děkujemo tobě, stary duhu tutyh ledin, že jesi nam svoje blagoslovjenje dal,
i naš festival, krug rodov – Rodokrug, v ktorom po naših tradicijah prastaryh ležiš, otvarjal.
tutčas obratimo se do vozhoda
Ej ty velika silo ognja, ktory žariš v Solncu našem,
ktory na vozhodu rodiš se, mužska silo tvorjenja,
světlo na putu mudrosti, ognju, ktory vse nečisto pališ,
dobro k nam došel do festivala tutogo prostora mudrosti.
Zažigaj nam plamenj propojenja i sustrěči.
Tako tebe prosimo, i pri silě vozhoda tebe do nas prizyvajemo.
Slava ognju věčnomu, Svarožiča, Svaroga, nehaj on očisti nas, i vede nas. Slava!
tutčas pozdravimo sily zapada
Voděnko naša živa, ty ktora krajinama pěvaješ, velike naše rěky, solzy materij věky.
Jezera i glubiny, potoky, vodo v lunu, ty ktora život daruješ, ljubu nam davaješ,
Silo materi, ženy, do glubiny zanurjeny, ktora doždem blagosloviš plodam, krov naša, ktora pluje ješče,
blagoslovi dělu našemu. Nehaj ljubu imajemo, čuvstvo, i silu.
Dano, blagoslovi Mokoša, že voda život donaša. Slava!
pozdravimo sily sěvera
Větr razdul iluzije, vse lži i strah, vměsto njih pěvaje i goni děti na lukah.
Glasom prědkov jest, ktoryh množstvo kako gvězd,
pěsnju svojeju vedut nas dalje, kde Stribog i Meluzina tancevaje.
Kde mudrost i razum jest, takože duh bogov vsegda jest.
Kde razum i pokornost, tam Pogody udobnost.
Nadyhaj se, idi dalje, tam kde tvoje srdce i mysl vsegda jesi povezal.
Nehaj větr ješče blagoslovi Rodokrugu našemu,
veselostju i radostju podpori tuto dělo vsjakomu. Slava větru! Slava.
tutčas obratimo se do juga
Naše mati Zemjo, ktora nam dom davaješ, děkujemo za vse, čto nam daruješ.
Za plody, jedivo, dom, za tělo naše, za vse bytja, i za posvečene rody naše.
Nehaj pozdravjena zemjo češska, hvala za tvoju krasotu, že jesi tako lěpa.
Nehaj naš urodžaj Živa brani, zemja Mokošu posvečena.
Slava tobě, materi! Věčna slava.
tutčas pogledimo do nebesi
Svarog, komnata prědkov slavnyh.
Bogi, ktori nam život dali, věčna slava vsejmiru, ktory rod nam na měru stvoril.
V bezkonečnom prostoru ješče Lada, ktora ljubu i svatbeno supružstvo nam dala.
Perun potom silu i grom, ktory vse zlo bije, i Svantovit, ktory osvěčaje naše dušu i dom.
Věčna komnato světla, koruno našego veleduši, slava tobě Pravi!
Slava nebesnym bogam i silě světla! Věčna slava.
i ječše pogledajte okolo sebe
To jest naš Jav, svět stvorjeny iz vsih sil, kde cěly vsejmir strětil se.
Kako navrhu tako i dolě, dogovor byl jasny – stvorjenje vsih bytostij.
Tut my stojimo i rukami držimo se,
jesmo jedin krug i jedna božja sila, božja esencija vsego bytja,
vse tut prěživaje, vsjaky tuto uživaje.
Děkujemo za lěsy, životnu zvěr, dobre sily tutogo prostora.
Posvečena silo duha lěsov i lučin, nehaj našemu strěčenju od srdca smějemo se.
Děkujemo vsim bytjam! Slava duhu Java!
Želajemo uspěh vsim i vsěmu dostatok sil.
A na koncu, kogda ruky naše položimo na zemju,
i budemo korjeny našego drěva života čuti, gluboko do sutstva glubin zemje zanorjene,
to Veles, vladca podzemja, žezlo svoje bral, daby silu čarovnu i plodnost vsim daroval.
Vladca noči, sily i čara, nehaj plodnost i silu daje vsim,
mudrost, bogatstvo i pokojno spanje nam požedajučim.
Znanje věkov i velike proby, dopustili vozrast mudrosti
narodu našemu, jegovoj silě i hrabrosti.
Nehaj i dalje veliky Veles jest tu s nami,
My tu stojimo i vsjaky jemu pokorno se sklani.
Slava světu duhov, slava duhu podzemja,
nehaj ne tratimo dary jasnovidcev i nehaj imajemo dobre groše naše.
Slava vam, Velesu i Morano!
Život i smrt – i ponovo život – tuto volja bogov jest,
a našej molitvě konec došel jest.
Slava rodnym bogam!
Slava zemji našej i narodu našemu!
Slava Rodokrugu!
QR-kod članka
RSS kanal
