MEDŽUSLOVJANSKE NOVOSTIМЕДЖУСЛОВЈАНСКЕ НОВОСТИ
MEDŽUSLOVJANSKE NOVOSTIJan Vít
Pivo jest jedin iz najstarějših alkoholičnyh napitkov pijemyh v vsim světu. Ime pivo jest staroslovjansko slovo, ktoro značilo najrazširjenějši i najobyčajny napitok. Uže stare narody, Sumerjani, Egiptijani i Kelti znali pivo kako pitje varjeno iz kvašenogo zrna.
Najznanějše zrno, iz ktorogo jest pivo varjeno, jest ječmenj, ale takože je možno upotrěbiti pšenicu, kukuruzu i druge zrna. Pivo varjeno iz pšenice jest imenovane bělo pivo i jest to jedno iz popularnyh piv v němečsky govorečih krajinah. Ječmenny slad, hmelj i voda sut dnes tri osnovy, iz ktoryh jest pivo varjene v dnešnjih modernyh pivovarskyh domah. Hmeljny cvět jest osnovny ingredient, ktory davaje pivu jego delikatny gorjky vkus.
Sut dvě osnovy kvašenja piva. Pivo kvašeno iz vrha i pivo kvašeno iz dola. Varjenje piva s upotrěbjenjem kvašenja iz vrha jest starša metoda. Tuta metoda jest preferovana od malyh pivovarskyh domov i domašnyh pivodělateljev, zatože jest legka, prosta i dostupna i ne trěba iměti složene tehnologije. Iz vrha kvašeno pivo jest vyše vozljubjeno v velikobritanijskyh krajinah.
Naprotiv tomu, iz dola kvašene piva sut vyše pijeme i preferovane v slovjanskyh i němečskyh krajinah. Najznanějše pivo dělano metodoju dolnogo kvašenja jest pivo zvane Pilsner Urquell. Tuto pivo jest produkovano v gradu Plzeň (čitaje se plzenj), na jugozapadu Čehije, blizko němečsko-češskoj granice. Tehnologiju varjenja plzeňskogo piva prinesl v grad Plzeň, bavarijsky pivovar Josef Groll, ktory načel variti najdobre pivo od drugyh piv i proslavil jego v širokom kraju i za jego granicami. Dnes vse piva na světu, ktore sut varjene metodoju Josefa Grolla i držet ravne tehnologične postupanja, mogut byti zvane i nositi znak Pilsner Beer.
V prošlosti bylo pivo iz pivovarskyh domov do gostinic voženo v drěvěnyh bočkah vloženyh na vozy tegnjenyh konjami. Dnes jest pivo polnjeno do modernyh aluminijevyh barelov i transportovano do restoranov s pomočju želězničnyh vozov ili avtokamionov. V gostinicah jest pivo drženo v temnyh i hladnyh skladah, i od tamo črpano s pomočju nasosov do steklěnyh čaš i potom raznošeno medžu gostjami.
Pivo ne sodrživaje toliko samo alkohol, ale takože imaje mnogo mineralov, vitaminov, ionov i sladkyh substancij. Pitje piva jest dobro za směh, duševno razpoloženje i protiv vysokomu krovnomu pritisku. Naprotiv tomu, veliko i težko pijanstvo može privoditi i sdějati različne vnutrne problemy, napriměr cirozu, raka i druge zle hvoroby i bolesti.
QR-kod članka
RSS kanal
