Tipy mostov

kategorija: NAUKA - TEHNIKA
datum: 2022-07-26, avtor: ZK

V sekciji "Putovanje" jest članok o najdolžejšim visęćim pěšehodnom mostu. V tutom članku objasnjajemo, čto jest visęći most i kake jestvujut tipy mostov.

žrlo:
1) ...www.engineeringclicks.com/types-of-bridges/
2) ...w.mostow.ru/klassifikaciya-konstrukciya.php
3) ...royone.com/bridge/klassifikacii-mostov.html

Mosty možno sortovati po raznym kriterijam, napriměr po
1) konstrukciji
2) upotrěbjenju
3) materialu
4) prěhodu prěgrady
5) stanju (statusu)
6) vuglu križenja prěgrady
7) vyšině

Po konstrukciji jestvuje sedm glavnyh tipov mostov, koje sut byli v prošlyh godah upravjane i ulučšane.
1. Grędny most (beam, балочный)
2. Ramny most (truss, рамный)
3. Konzolny most (cantilever, консольный)
4. Lučny (svodny, arčny) most (arch, арочный)
5. Svęzany lučny most (tied arch, связанный арочный)
6. Visęći most (suspension, висячий)
7. Zavěšeny most (cable-stayed, вантовый)

Sposob, kako jest rěšena vertikalna/horizontalna napętosť, oprěděljaje konstrukciju raznyh mostov. V někyh slučajah jest nesućej masoju doska mosta, v drugyh slučajah stolpy (pilony, věži). Takože sut konstrukciji, koje napętosť prěnosęt mostnymi kabljami, i to umožnjaje oprěděljenu fleksibilnosť za različne tereny. Jedin iz zajmlivyh faktorov iz gledišče raznyh konstrukcij mostov jest jihny věk žitja (života) i fakt, že jestvujut uže mnogo stolětij. Mnogo iz najznanyh světovyh inženjerov ne smoglo dodati nikakyh značnyh ulučšenij k osnovnym nesučim konstrukcijam prošlyh godov. Tutčasno posmotrimo razne tipy mostov i kako funkcionujut.

Grędne mosty


Grędny most jest jedin od najprostějših tipov mostov. Idealnym priměrom je most, koj možete viděti na pohodkě. Povrhnja paluby obyčno sostoji se iz drěvěnyh ili kamennyh dosok, koje sut na oboh stranah podpirane dvoma brvnami (grędami) prohodęćimi medžu oporami (stolpami) - zovut se nosniky (nesut brěmę)
Mnogo čęsto najdete druge nosniky razměščene medžu glavnymi nosnikami, da by jim uveličali podporu i stabilnosť.

Grędny most jest nejčęstějšim tipom mostu.

Ramne mosty


Ramny most jestvuje po stolětja. Jest to nosna konstrukcija, koja sodrža prěgradny ram (vęznik). Toj rabi mnogo efektivno, ale jest mnogo prosty.
Jestvuje mnogo raznyh variantov prostogo ramnogo mosta, ale vsi sodržajut trivugolne sekciji. Rolja tyh trivugolnikov je važna, jerbo efektivno absorbujut tęgu i napor (pritisk) i tvoręt napornu (natužnu) konstrukciju, koja je sposobna progoltati dinamično otęženje. Tuta směs tęgy i napora privodi k tomu, že konstrukcija mostu shrani se i pokrytje ostavaje se ohranjeno navyše pri odnosno silnom větru.

Konstrukcija ramnogo mosta považaje se kako najsilnějša (najstabilnějša).

Konzolne mosty


Kogda byl projektovany prvy konzolny most, smotrilo se ovo kako veliky tehničny prolom. Most funkcionuje pri pomoći konzol, a to mogut byti proste nosniky ili grędne nosniky. One sut iztvorjene iz prědnapętogo betona ili konstrukčnoj stalji (ocelj, čelik). Ako obvažite, že vodoravne nosniky, koje tvoręt konzolno ramę, sut podpirane toliko (samo) iz jednoj strany, to izględa nemnogo opasno (nebezpečno).
Dvě konzolne ramena sut ale svęzane tako zvanym „podvěšenym razpętjem“, i to je realno srědina, koja ne imaje pod soboju pręmu podporu. Otęženje mosta jest podporjeno diagonalnymi svęzami s vodoravnymi nosnikami v različju od tipičnoj vertikalnoj svęzi.

Lučne (svodne) mosty


priměr : Most Gaoliang iz Lětnjego palaca

Jestvuje mnogo raznyh tipov lučnyh mostov, ale vsi imajut spolne (obće) centralne elementy. Vse mosty imajut opory, koje koristajut se k podpiranju zakrivjenoj lučnoj konstrukciji iz-pod mosta. Najčęstějšim tipom lučnogo mosta jest viadukt, to jest dolgy most sostavjeny iz mnoga lukov (ark). Bočny pritisk, koj je tvorjeny razpętjem luka, prěnosi se na opory. Zato je trěba, da by tute čęsti mosta ostali se krěpke, nenarušene i dobro osnovane.
Možete uviděti mnogo lučnyh mostov s dekorativnoju pokladkoju stěn (zidi), s lěpym dizajnom.
Prosty, ale mnogo efektivny lučny most može nositi vse – od pěšakov do tęžkyh kolejek..

Svęzane lučne mosty


priměr: Infinity Bridge v Stockton-on-Tees

Svęzany lučny most imaje očarujući dizajn, koj sodrža lučnu konstrukciju (obyčno metaličnu) podporjenu vertikalnymi svęzami medžu lukom i paluboju. Vrhy lučnoj konstrukciji sut svęzany dolnym pasom (lenta, pojas). On děje podobnym sposobom kako tętiva luka. Napor směrom na dol iz lučnoj konstrukciji prětvarja se vertikalnymi tęglami (sponami - svęzi) na napętosť. Mnogi ljudi prědpokladajut , že opory držęt svęzany lučny most i lučnu konstrukciju na svojem městu. Medžutym paluba ili usiljena struna povęzuje vrhy vsakogo konca luka. Najlěpšejšim priměrom je tętiva, koja absorbuje pritisk i drži obě strany luka v kontaktu, dokolě pritisk konečno ne izravni se.


lučny most a svęzany lučny most - sravnjenje

Visęće mosty


priměr: Hromolitografija visęćego mosta Great East River (Brooklyn Bridge), Currier a Ives, 1883

Konstrukcija stereotipnogo visęćego mosta izględa mnogo prosto, ale dizajn je neobyčno efektivny. Mostovka (paluba mosta) visęćego mosta je nesuća masa konstrukciji, koja je podvěšena iz-pod visęćih kabljev (vęzal) pri pomoći vertikalnyh podvęzkov. Visęće kabelji sut ukrěpjene na oboh koncah v zemju ili v vertikalnu oporu (pilon). Kolikosť pilonov zavisi od veličiny mosta, točnějše od sumarnogo otęženja mosta. Glavne kabelji sut iz silnyh stalovyh (oceljevyh, čeličnyh) kabljev (vęzal).

Postavjenje visęčego mosta byvaje dolgo i najdražějše (čęsto koštuje vyše miliarda dolarov).

Zavěšene mosty


priměr: Most Rio Antirrio v Greciji

Zavěšeny most je zavisny od opor (pilonov), koje sut nesućimi elementami konstrukciji. Kablje sut svęzane od vrha pilonov k palubě pod njimi. Ili pręmo iz samogo kraja ili iz raznyh měst na vrhu pilona. Svęzane sut v raznyh městah paluby tako, že tvoręt vějaŕ (vějalo).

Tutoj tip konstrukcije koristaje se za razstojanja dolžějši neželi u konzolnyh mostov, ale menši neželi u visęćih mostov. Jedin iz glavnyh problemov tutoj konstrukciji jest, že centralna svez kabljev može dějati veliky vodoravny pritisk na palubu mosta. Za to trěba konstrukciju paluby usiljati, da by odolěla staly tisk.


razlika medžu visęćim i zavěšenym mostom